ព្រះសីហនុ៖ ករណីហិង្សាទៅវិញទៅមករវាងជនជាតិវៀតណាម និងជនជាតិចិន ២ក្រុម សរុបមានគ្នា ១៥នាក់ បានវៃតប់គ្នាយ៉ាងអាណាធិបតេយ្យ ផ្អើលដល់សមត្ថកិច្ចចុះបង្ក្រាបទាំងកណ្តាលរាត្រី នៅក្នុងភូមិសាស្ត្រក្រុងព្រះសីហនុ ស្រាប់តែប្រទះឃើញអាវុធខ្លីមួយដើមថែមទៀតផងដែរ។

កម្លាំងការិយាល័យនគរបាលព្រហ្មណ្ឌកម្រិតធ្ងន់បានទទួលព័ត៌មានថា មានករណីហិង្សាមួយបានកើតឡើងរវាងជនជាតិវៀតណាម និងជនជាតិចិន ២ក្រុម ក្នុងនោះ ១ក្រុមមានគ្នា ម្នាក់ឯង និង១ក្រុមទៀតមានគ្នា ១២នាក់ ស្ថិតនៅមុខអាគារកាស៊ីណូ វ៉ាង ឆាវ ជាប់សាលាបឋមសិក្សាកម្មករ ស្ថិតនៅភូមិ៤ សង្កាត់៤ ក្រុង-ខេត្តព្រះសីហនុ នៅយប់រំលងអធ្រាតថ្ងៃទី២៨ ខែសីហា ឆ្នាំ២០២៣។

ក្រោយពីទទួលដំណឹងនេះភ្លាម ស្នងការនគរបាលខេត្តព្រះសីហនុ លោក ជួន ណារិន្ទ បានចាត់ឱ្យការិយាល័យនគរបាលព្រហ្មទណ្ឌកម្រិតធ្ងន់បានចុះដល់ទីតាំងកើតហេតុខាងលើ និងបានធ្វើស្រាវជ្រាវ ឆែកឆេរនៅក្នុងអាគារ កាស៊ីណូខាងលើ ឃាត់ខ្លួនបានមនុស្សចំនួន ១៣នាក់ ពាក់ព័ន្ធករណីហិង្សា (វាយគ្នាទៅវិញទៅមក)។

កំឡុងពេលចុះឆែកឆេរ កម្លាំងជំនាញបានរកឃើញ ជនសង្ស័យចំនួន ២នាក់បន្ថែមទៀតដែលកំពុងស្នាក់នៅក្នុងបន្ទប់លេខ 8515 នៃអគារខាងលើ ពាក់ព័ន្ធករណីកាន់កាប់អាវុធដោយខុសច្បាប់ (អាវុធខ្លីម៉ាក K54 ចំនួន ១ដើម បង់១ គ្រាប់ ៤គ្រាប់ និងកាំបិតចំនួន ៣ដើម)។

បច្ចុប្បន្នកម្លាំងជំនាញបានធ្វើការឃាត់ខ្លួន ជនសង្ស័យទាំង ១៥នាក់ រួមទាងវត្ថុតាងមកស្នងការដ្ឋាននគរបាលខេត្តព្រះសីហនុ ដើម្បីបន្តនីតិវិធី៕